TOVUZ KLUBU ÜÇ AYDIR Kİ, FUTBOLÇULARIN MƏVACİBİNİ VERMİR
"Turan"ın müdafiəçisi Muammər Ərdoğdu klubundan AFFA-ya şikayət edib. Türkiyəli legionerin dediyinə görə, buna səbəb məvacibini ala bilməməsidi. Üstəlik, Muammər Tovuz klubunda yeganə belə futbolçu deyil. Kiçik araşdırma əsasında məlum oldu ki, "Turan" artıq üç aydır, futbolçuların maaşlarını vermir. Muammər isə digərləri kimi məsələyə göz yummaq niyyətində deyil: "Dünən AFFA-ya və PFL rəhbərliyinə bu barədə məlumat vermişəm. Dekabr ayından bəri məvacibimi ala bilmirəm. Deyirəm, heç olmazsa transfer vərəqəmi verin, ancaq nə maaşımı verirlər, nə də sənədlərimi. Heç olmazsa sənədlərimi versələr, başqa kluba keçərdim. Axı hamı kimi mənim də pula ehtiyacım var". Ərdoğdunun dediyinə görə, əgər AFFA bu barədə tədbir görməzsə, o, FİFA-ya və UEFA-ya şikayət edəcək: "Məsələnin daha sakit şəkildə, elə buradaca həll olunmasınını tərəfdarıyam, amma əgər tədbir görülməzsə, qitə futbol qurumuna, UEFA-ya da şikayət edəcəm. Çünki mənim şəxsi müqaviləm var və orada klub öhdəliklərini yerinə yetirməyəcəyi halda atılacaq addımlar göstərilib".
